زوج البلوغر آمال أبو المجد على اتّهامها له بضربها.

زوج البلوغر آمال أبو المجد على اتّهامها له بضربها.

في أول رد على اتهامها له بالاعتداء عليها بالضرب المبرح والشروع في إجهاضها، قال أحمد جوبا، زوج البلوغر والتيكتوكر الشهيرة آمال أبو المجد، في منشور عبر خاصية القصص المصورة الملحقة بحسابه الخاص في “إنستغرام”: “يا جماعة أنا مش هتكلم عن الحقيقة علشان الحقيقة أنتوا شايفنها مش كاملة، وأنا هطلع اتكلم في ستوري واحد بس أو اتنين، هاختصر فيهم حاجات كتير لأن آمال لسة مراتي وعلى ذمتي، وكل اللي أنتوا شايفينه ده جزء صغير من الفيديو الكامل”.

وأضاف: “أنا عمري ما هطلّق أم ابني، ولا أقدر أعيش بعيد عن ابني يوم واحد، ولا هقدر أعيب فيها بأي كلمة، أو أي حاجة عشان البيبي اللي جاي ميقولش أبوه أذى أمه، لكن أمه أذت أبوه عادي، الست متستحملش والراجل يستحمل، وأنا الحمد لله جبل واستحمل أي حاجة”.

وعلى الفور، ردّت آمال أبو المجد من خلال حسابها الشخصي في “إنستغرام” قائلةً: “آسفة إني خضتكم عليا، والموضوع حصل من 4 أيام، بس قولت أقولكم بعد ما تعاملت بالقانون وإن شاء الله ربنا ينتقم من اللي عمل كده، ويارب اللي شمتان يحصل فيه كده”.

وكانت البلوغر الشهيرة والتي ذاعت شهرتها على موقع “تيك توك” من خلال فيديو رقصها مع زوجها على أنغام أغنية “غيري مني وولعي”، قد نشرت مجموعة صور وفيديوهات عبر “إنستغرام” كشفت من خلالها عن تعرضها للضرب على يد زوجها، لافتة إلى أن زوجها الذي كان يحبها بحسب زعمها سعى إلى إجهاض جنينها.

ونشرت آمال مقاطع فيديو عدة ظهر فيها زوجها وهو يضربها، ويسحلها في الشارع أمام المارّة، مع التعليق: “يؤسفني أقولكم إن ده جوزي أحمد اللي كنتوا كلكم بتشوفوه بيحب، أهو اللي بيحب، شوفتوا الرجولة إيه رأيكم؟”.

وعن سبب الضرب، كتبت على مقطع فيديو: “كان عايز يجهض الجنين”، وبعدها نشرت صورة من التقرير الطبي، وكتبت عليها: “حق الست اللي تتسحل وكانت هتسقط في شهرها التالت فين، أنا كنت مختفية مش حزن ولا مرض، وهو بكل سهولة طلع من النيابة، أكنو معملش حاجة، بس أنا واثقة إن هنا الحق موجود”.

وعلّق عدد من متابعي آمال أبو المجد على هذا الأمر منتقدين ما يحدث مع هذه النوعية من البلوغرز، حيث كتبت إحدى المتابعات: “موضوع آمال أبو المجد وغيرها كتير من مشاكل البلوغر واليوتيوبر والإنفلونسر، اللي بنام ونقوم بعد ما كنا لسه بنتفرج على هداياهم لبعض، والمشاعر الجياشة اللي طافحة عليهم كل يوم، آمال كانت لسه بتحتفل الأسبوع اللي فات هي وجوزها”.

وكتبت متابعة أخرى: “كل يوم حادثة ضرب أو قتل أروع من اللي قبلها، الواحد يدفن نفسه في تربة أسهل، آمال أبو المجد اتسحلت في الشارع، اللي بتنزل فيديوهات حب هي وجوزها، أنا اتخضيت بجد، بغض النظر عن محتواها، وعن هي عملتله إيه بس محدش يستاهل كده”.