كواليس إعلان وفاة تلميذة 4 ابتدائي بالطابور المدرسي صباح أمس الثلاثاء.
كواليس إعلان وفاة تلميذة 4 ابتدائي بالطابور المدرسي صباح أمس الثلاثاء.
منذ إعلان وفاة الطالبة #يارا_طارق طالبه الصف الرابع الابتدائي في مدرسة عثمان بن عفان ،التجريبة في مدينة العبور
وجميع جروبات تتناول خبر الوفاة
قدم حساب لاؤلياء الأمور.
(((#نصيحة لوجه الله🤚
لي ولكم
🔴علموا اولادكم ..
ان المدرسة و المذاكرة و المواد اللى ببدرسوها مجرد وسيله لتحقيق اهدافهم
مجرد سلم بيطلعوا عليه عشان يوصلوا لحلم نفسهم يحققوه
علموهم ان حاولوا تذكروا كويس و تحصلوا اكبر قدر من المعلومات
وان طالما بتعملوا اللى عليكم ده كفايه
ان الامتحان هو مجرد شوية اسئلة بتشوف هم فاهمين لحد فين
لكن مش تقييم بيحدد حياتهم او مصيرهم
ولو لا قدر الله ما جابوش الدرجة اللى متوقعين يجبوها
او ممكن لا قدر الله يسقطوا حتى
فده مش معناه ان الممتحن قصر لكن ساعات بيكون تعبان او عنده رهبة الامتحانات
او اى سبب
لكن مش اخر الدينا ولا نهاية الحياة
علموا اولادكم ما يخافوش او يشيلوا الهم او يضغطوا على نفسهم و يملوا نفوسهم بالرعب من مجرد نتيجة او تقصير ف حل امتحان
#يارا_طارق
ما حلتش فى امتحان English كويس
ورجعت بيتها
الله اعلم مامتها عنفتها او لا
او هى مجرد خوفها انها ما حلتش كويس و ممكن نتيجتها تكون مش كويسه
فده مالها رعب وضغط عليها 😢
ودخلت تذاكر
مامتها دخلت تشوفها لاقيتها ميته على ملزمة ال math
ماتت بسبب #ازمة_قلبية وهى بتذاكر 💔
طفلة المفروض حياتها عباره عن عدم مسئولية و مجرد لعب بجانب مدرستها
مش حياتها كلها تنتهى بسبب مدرسة ومذاكرة و امتحانات
اولادكم وحياة اولادكم اهم واغلى بكتييييير جدا
من تعليم و شهادة و يطلع الاول ولا الاخير هو مش سباق بينهم وبين بعض
اللهم هب الصبر لوالدتها و والدها و اثلج صدرهم 🤲🏻
واجرهم فى مصابهم و اخلفهم خيرا منه💔😢
ردود أفعال أمهات تلاميذ مدرسة عثمان بن عفان في العبور، تلك المدرسة التي شهدت إعلان خبر وفاة تلميذة رابعة ابتدائي أثناء المذاكرة بعد إن قالت “مش عارفة احل انا تعبانة”. )))
ردود أفعال أولياء أمور مدرسة عثمان بن عفان..
حيث قالت هند لبيب إحدى أمهات تلاميذ المدرسة المذكورة: إن المدرسة أذاعت خبر وفاة تلميذة 4 ابتدائي في فناء المدرسة أمام جميع التلاميذ، وطلبت من زملائها الوقوف دقيقة حداد.
وأضافت: أن فكرة إذاعة خبر وفاة تلميذة 4 ابتدائي المفاجئة على الملأ أثر سلبا على قلوب الأطفال لأن إدراكهم لمثل هذا الحدث معدوم.
واستكملت هند لبيب تصريحاتها التي كتبتها على جروب المدرسة قائلة: “ولادي رجعوا النهاردة من الامتحان متوترين جدا وسألوني كتير يعنى إيه سكتة قلبية يعنى ايه الله يرحمها والامتحان هو السبب ولا المنهج كتير؟”
واختتمت ولية الأمر تصريحاتها قائلة: أمر إذاعة وفاة الأطفال لا بد أن يكون بين الكبار فقط.
قصة وفاة تلميذة 4 ابتدائي
آخر مقطع صوتي لـ تلميذة 4 ابتدائي قبل وفاتها
ونشر اتحاد المدارس التجريبية، آخر تسجيل صوتي لـ تلميذة 4 ابتدائي التي توفيت أثناء المذاكرة، والتي هزت قصة وفاتها جميع المصريين على السوشيال ميديا اليوم.
وقالت تلميذة 4 ابتدائي في تسجيل صوتي أرسلته لمعلمها قبل الوفاة : أنا مش عارفة إيه الحل يا مستر ومش عارفة أحل ايه .. أنا تعبانة.
وسيطرت حالة من الحزن على رواد موقع التواصل الاجتماعي “فيسبوك”، بعد أن أعلنت مدرسة عثمان بن عفان عبر صفحتها على “فيس بوك”، عن وفاة تلميذة تدعى يارا طارق، بالصف الرابع الابتدائي، إثر أزمة قلبية مفاجئة.
وكشفت جنة علاء، ولية أمر أحد زملاء التلميذة المتوفاة، كواليس وفاتها، حيث قالت: “كان آخر فويس للبنت وهي تتحدث لمدرسها قائلة: أنا مش عارفة الحل إيه يا مستر وأنا تعبانة، وماتت على الملزمة”.
وتساءلت ولية الأمر: “ليه طفلة في سنة رابعة يقف قلبها بسبب المذاكرة والضغط والتفكير في الامتحانات؟ ليه صعبتوا المناهج على العيال؟”.
ولي أمر تلميذ
وقال طه عبد البر، ولي أمر أحد التلاميذ بالمدرسة: “البنت دي رحمة الله عليها ضحية الصف الرابع الابتدائي ومناهجه التي تتسم بأنها في منتهى الصعوبة، وفوق قدرة دماغ تلميذ عنده ١٠ سنوات، وأنا ولي أمر ولازم يكون في حل وإلا هننتظر ضحية تانية”.
وقال جلال عيسى: “المذاكرة عمرها ما تعمل كده، لكن الإهمال بيعمل أكتر من كده ربنا يرحمك يا حبيبتى برحمته”.
من جانبه، نشر الجروب الرسمي لـ مدرسة عثمان بن عفان عبر “فيس بوك” نعيا للتلميذة المتوفاة جاء نصه كالتالي: “إنا لله وإنا إليه راجعون.. انتقلت إلى رحمة الله تعالى الطالبة يارا طارق، بالصف الرابع الابتدائي 4e، إثر أزمة قلبية مفاجئة في منزلها، وتتقدم أسرة مدرسة عثمان بن عفان الرسمية للغات ومديرها الأستاذ حسن جمعة بخالص تعازينا القلبية لوالد ووالدة الطالبة، ونسأل الله عز وجل أن يسكنها فسيح جناته فهي ملاك الجنة.. نسألكم الدعاء”.