سوهاج:تعرف على نص التحقيق مع قاتل ضحية كنز الآثار.
سوهاج:تعرف على نص التحقيق مع قاتل ضحية كنز الآثار.
منذ أيام قتل شاب لم يتعدى عمره ل21 على يد شابان لتقديمه قربانا للجن من أجل فتح مقبرة أثرية..وننشر نص التحقيقات في تلك القضية واعترافات تفصيلية للمتهم بالقتل، كيف أقنعه؟!، وكيف استدرجه وقتله بدم بارد… وإلى التفاصيل.
أمام غرفة التحقيق، كان يقف المتهم الأول، شاب في بداية العقد الرابع، متوسط الطول والبنية، يرتدي الملابس البلدية عبارة عن جلباب كموني فاتح اللون، استدعاه رئيس النيابة للتحقيق معه.
اسمك وسنك وعنوانك
محمود عبد الفتاح، 32 سنة، عامل ومقيم عرابة أبو دهب مركز سوهاج
هل تقف على سبب وفاة المجني عليه إبراهيم عبد النعيم؟
انا اللي قتلته بعيار من فرد روسي
ما هي طبيعة عملك تحديدًا؟
انا معايا لودر شغال عليه في المحاجر وبصيد صقور في الجبل ناحية المحاجر غرب الأراضي الزراعية وببيعها وبسترزق منها
ومتى تحديدًا تذهب إلى ذلك المكان؟
انا بروحه يوم الجمعة علشان اليوم ده بريح فيه من الشغل المتهمان
هل تقابلت مع أية أحد في ذلك المكان يوم الجمعة الموافق 14\10\2022؟
أيوه انا قابلت واحد قالي انه اسمه حماده ولما الحكومة مسكتني عرفت ان اسمه السيد عبد السلام من أولاد عزاز.
هل سبق لك معرفة ذلك الشخص أو رؤيته من قبل؟
لا انا اول مره اشوفه.
هل تحاورت مع ذلك الشخص في ذلك المكان؟
ايوه
وما طبيعة ذلك الحوار الذي دار فيما بينكما؟
هو قالي انت بتعمل ايه هنا قولتله انا بصطاد صقور، قالي ايه اللي خلاك تعمل كده قولتله انا عليا اقساط كتيره بتاعة اللودر ومعايا اخويا عليه حكم بالإعدام ومش قادر ادفع فلوس للمحامين فقلت اصيد الصقور وابيعها علشان تمنها غالي، وقالي انا اسمي حماده من أولاد عزاز، وانا قولتله انا اسمي محمود فقالي، انا عندي شغلانه وراها مكسب كويس قولتله ايه هي قالي، في مقبرةهنا ورا الجبل ومعايا شيخ وبيقول علشان تفتح المقبرة دي يلزمها دم ولد شباب، قولتله انا مليش دعوة بالموضوع ده قالي شوفلنا الموضوع ده وليك تلت اللي هيطلع منها، فقولتله خلاص ماشي فقالي، خد سجل رقمي انا اسمي حماده خدت منه الرقم وعلمته بعلامه في التليفون علشان مش بعرف اكتب وشاورلي على مكان أوض مبنية بالبلوك وقالي اول ما تجيبه تعالالي هناك هتلاقيني مستنيك وان ملقتنيش رن عليا.. وبعدها خد الموتوسيكل بتاعه ومشي وانا روحت البيت.
ما الذي دعاك إلى الاستفادة في الحديث مع ذلك الشخص رغم انك لم يسبق لك معرفته أو رؤيته؟
أنا بحكيله ظروفي عادي وحكيتلوا نيتي
ما الذي دعا سالف الذكر إلى اطلاعك على ذلك الأمر الذي أخبرك به وهو التنقيب عن الآثار؟
أنا لما حكيتله ظروفي وقولتله إن ظروفي صعبة قالي على موضوع الآثار ده.
ما طبيعة المكان الذي تقابلت فيه مع المدعو السيد عبد السلام الذي أخبرك بأنه يدعى حماده لأول وهلة؟
هو جبل مفتوح
هل كان برفقتكما أحد حينئذ؟
لا كنا لوحدينا
ما طبيعة الطلب الذي طلبه منك سالف الذكر؟
هو طلب مني إني أن اجيبله ولد شباب عشان يدبحه على المقبرة زي ما قاله الشيخ
ما الذي بدر منك عندما طلب منك ذلك الطلب؟
قولتله خلاص ماشي أنا هشوفلك الموضوع ده.
هل من ثمة إكراه وقع عليك من سالف الذكر من اجل انصياعك لطلبه وتلبيته؟
لا
اذاً ما الذي دعاك إلى وعدك له بتلبية طلبه؟
انا قلت ظروفي صعبة ومحتاج فلوس وقلت موضوع الآثار ده هيطلعلي فيه قرشين حلوين.
هل أخبرت سالف الذكر بالشخص الذي تجلبه له وينفذ عليه رغبته؟
لا انا مكانش في دماغي حد معين
ما الذي بدر منك عقب مقابلتك لسالف الذكر وحواره معك؟
انا رجعت البيت وقعدت افكر في الموضوع واشوف مين ينفع في موضوع الاثار ده
وما الذي حدث عقب ذلك؟
بعد يوم الجمعة 14\10\2022 بحوالي يومين اتصل بيا حماده ده وقالي عملت ايه في الطلب اللي قولتلك عليه. قولتله اديني بدور على حد واول لما اوصله هكلمك قالي خلاص ماشي.
هل اخبرت احد معين بما حدث معك؟
لا انا ماقولتش لحد
ما الذي حدث عقب ذلك؟
بعد ما اتصل بيا بيومين اللي اسمه حماده قابلت ابراهيم عبد النعيم الله يرحمه.. بالصدفة في الطريق عند مدينة سوهاج الجديدة وكان يوم التلات بعد العصر تقريبا.
هل كانت هناك سابق معرفة بينكما؟
ايوه كان شغال معايا تباع على اللودر بتاعي من حوالي سنتين ونص وبعدها سافر هو بحري واشتغل هناك.
هل تقابلت مع سالف الذكر قبل مقابلتك له في الزمان والمكان سالفي الذكر؟
لا انا ماقابلتهوش من بعد ما سابني غير في يوم التلات اللي قبل اللي فات.
هل تحاورت معه حين مقابلتك له؟
ايوه
ما طبيعة الحوار الذي دار فيما بينكما؟
احنا بعد ما سلمنا على بعض قالي شوفلي شغلانة ياعم محمود عشان انا مش عايز اسافر تاني فأنا قولتله خلاص ماشي ربنا يسهل وبعدها مشيت.
ما الذي حدث عقب ذلك؟
انا بعد ما قابلت ابراهيم جه في بالي إن هو اللي هينفع في موضوع الآثار.
ومتى تحديدًا استقر في وجدانك على ان ابراهيم هو الذي سوف تقوم بجلبه إلى المكان الذي ارشدك اليه المدعو حماده ويقوم بتنفيذ طلبه عليه؟
هو من ساعة ما قابلت ابراهيم في الطريق وانا حطيت في دماغي ان هو اللي هينفع في الموضوع ده.
هل المدعو السيد عبد السلام أوحماده عاود الاتصال بك من أجل طلبه؟
لا هو مكلمنيش بس حاول يتصل بيا يوم السبت 22\10\2022 بس لقى تليفوني مقفول وانا عرفت كده لما فتحت تليفوني في اليوم ده.
وهل اتصل بك ابراهيم عبد النعيم بعد مقابلتك له؟
ايوه انا قولتله انت فين يا إبراهيم قالي انا في البيت.. فقولتله انا شوفتلك شغلانه وعاوز اقابلك.. بيتك فين بالظبط قالي جنب محطة المياه في اولاد غريب هستناك هناك.
ما الذي حدث بعد ذلك؟
انا قابلته وقولتله في واحد قابلته في الجبل وقالي في مقبرة عايز واحد فدية عليها علشان تتفتح.. وأنا فهمت ابراهيم ان انا وهو هنروح هناك هنقابل الراجل اللي قالي على الموضوع ونستخبي في مكان لحد مايجي علينا ونثبته انا وانت ونخليه يعرفنا على مكان المقبرة ونهدده بالسلاح وبعد كده نمشيه ونشوف واحد يفهم فيالموضوع ده ونعرفه على مكان المقبرة وناخد انا وانت اللي فيها راح ابراهيم اتردد شويه وقالي لحسن يكون هناك في عصابة ومعاهم سلاح انا اقنعته ان الموضوع امان وقلتله روح هات عصايه راح جاب عصايه خرزانه من البيت وجه ركب معايا على الموتوسيكل.
وهل كنت تصدق الحديث مع ابراهيم رحمة الله عليه؟
لا انا كنت بكدب عليه علشان ييجي معايا
وهل صدقك؟
انا قعدت اقنع فيه لحد ما صدق كلامي واقتنع.
ما الذي دعاك إلى اقناع سالف الذكر بما اخبرته كذباً؟
عشان انا ملقتش حد غيره ينفع في موضوع الآثاروهو كان متردد في الأول.
وما الذي بدر منه عقب ما اخبرته به؟
هو قالي خلاص ماشي انا هاجي معاك
ما الذي حدث عقب ذلك؟
انا اخدته وركبته الموتوسيكل بتاعي وطلعت بيه على الجبل وكانت حوالى الساعة خمسة ونص المغرب لحد ما وصلت الأوضة اللي شاورلي عليها قبل كده حماده.
هل كان أحد برفقتك والمتوفى إلى رحمة مولاه ابراهيم حال ذهابك به إلى المكان سالف الذكر؟
لا كنا رايحين لوحدنا
ما طبيعة المكان الذي نزلت فيه انت وهو؟
هو مكان بالجبل فيه أوض مبنية بالبلوك
وهل ابصرت اذا ما كان احد متواجدا بذلك المكان؟
لا مكانش حد موجود
ما الذي بدر منكما حال وصولكما لذلك المكان؟
نزلت انا وابراهيم من على الموتوسيكل ودخلنا جوه الأوضة دي.
وما سبب نزولك في تلك الغرفة تحديداً؟
عشان ده المكان اللي قالي عليه حماده هيستناني فيه
وهل اتصلت بالمدعو حماده؟
لا علشان انا ملحقتش اتصل بيه من اللي عمله ابراهيم الله يرحمه وانا معاه.
وما الذي فعله ابراهيم؟
هو طلع بره الأوضة ونور كشاف التليفون
وما الذي بدر منك حينئذ؟
انا طلعت عليه وخليته يطفي نور الكشاف لحسن يتصل بحد.
وما الذي دعاه إلى الخروج من تلك الغرفة واخراج هاتفه المحمول وانارته؟
علشان هو سمه صوت الديابه ولما لاقاني طلعت السلاح في الأوضة خاف وقلق مني
ما طبيعة السلاح الناري الذي كنت محرزه حينئذ؟
هو فرد روسي.
وملك من هذا السلاح؟
ملكيأنا.. اشتريته من واحد زمان مش فاكر اسمه.
وما سبب احرازك له؟
عندي أخويا عبد الرحمن اتهم في قضية قتل ومن ساعتها وأنا حاطط السلاح في جيبي لحسن حد يجي ياخد تاره مني.
وما الذي حدث عقب قيام المجني عليه بالخروج من الغرفة؟
هو فضل يرجع لورا ويمشي ويمد
وما الذي دعاه إلى ذلك؟
عشان هو خاف وكان عايز يروح
وما الذي حدث عقب ذلك؟
وهو ماشي أبوه رن عليه، وطلع يمد وهو بيكلم أبوه بس مسمعتش قاله ايه وأنا مديت وراه فوقعت على حجر على رجلي الشمال والفرد اللي معايا كان فيه طلقة فضربتها على إبراهيم فجت فيه ومشي على رجله شوية وبعديها وقع على الأرض في حتة نازلة لتحت.
وما هي الحالة التي كنت عليها وكان عليها المجني عليه حال إطلاقك العيار الناري صوبه؟
أنا كنت واقع على الأرض.. ركبتي الشمال محصلة الأرض ودراعي الشمال واقف جنبها ساند به على الأرض ومشط رجلي اليمين على الأرض وركبتي اليمين مرفوعة لفوق ودراعي اليمين اللي كنت ماسك به الفرد لقدام ناحية إبراهيم ووشي معدول على إبراهيم وهو كان مديني جنبه اليمين وهو بيمد وماسك التليفون في إيده حاطه على ودنه.
وما المسافة التي كانت تفصل بينكما؟
حوالي مترين
وما قصدك من تصويبك للعيار الناري تجاه المجني عليه؟
أنا ماكنش قصدي حاجة هو عيار طلع من السلاح اللي كنت ماسكه.
وما الذي بدر منك بعد إطلاق النار عليه وسقوطه في الحفرة؟
روحت وقفت فوقها وبصيت عليه وهو واقع وماكنش بيتكلم وماأخدتش بالي إذا كان بيتحرك ولا لأ. وبعدها سيبته ومشيت.
وما الذي حال دونك بأن تحاول إسعاف المجني عليه إن لم تكن قد قصدت قتله؟
أنا خوفت من الموقف وخوفت من الديابة
وإلى أين ذهبت بعد ما حدث؟
روحت على البيت وحطيت السلاح في الزراعة اللي جنب بيتنا وطلعت بره أحلق دقني عند الحلاق.
وهل المتهم السيد عبدالسلام الذي أخبرك بأنه يدعى حماده هاتفك يوم الجريمة؟
أيوه حاول يرن عليا بس تليفوني كان مقفول ولما فتحت التليفون رن عليا وكلمني وقالي محمود معايا قولتله النمرة غلط وبعد كده قفل المكالمة ومرنش تاني.
ما الذي دعاك أن تقول له النمرة غلط؟
كنت متلخبط ومتوتر من اللي حصل ومش عايز أكلم حد
ما الذي حدث بعد ذلك؟
لما عرفت أن الحكومة جت تسأل عليا هربت وطلعت على المحطة وسافرت اسكندرية.
بعدها وجهت النيابة له تهمة القتل العمد مع سبق الإصرار والترصد، وخرج من غرفة التحقيق ليدخل المتهم الثاني، ولكنه أنكر،وكل سؤال يسأله رئيس النيابة له يقول محصلش ومعرفش، حتى تم استدعاء المتهم الأول مرة أخرى لغرفة التحقيق وتمت المواجهة بين الاثنين إلا أنه أصر على الإنكار