سيدة ثلاثينية خلعت جوزها في المحكمة عشان طبق كشري
سيدة ثلاثينية خلعت جوزها في المحكمة عشان طبق كشري
هويدا زوجة ثلاثينية تعيش في شقة سكنية بمدينة حدائق حلوان.. تزوجت قبل ثلاثة أعوام ولم يرزقها الله بأطفال، إلا أنها وجدت نفسها بين سيدات محكمة الأسرة بالمعصرة، تطلب الخلع من زوجها بسبب إهانته لها في ساعات متأخرة من الليل نتيجة وجبة كشري قدمتها له
و سردت هويدا مشكلتها مع زوجها والتي بسببها أقامت دعوى خلع بمحكمة الأسرة بالمعصرة، قائلة تعبت خلاص من الإهانة.. كل شوية شتائم وسب وإهانة،دي مش عيشة وأنا مش خدامة أنا مفروض ست البيت، مراته لكن هو بيتعامل معايا على أني خدامة وكل شوية صوت عالي وشتائم ومفرج عليا الجيران كلها
وقالت هويدا في دعوى الخلع أنا عندي 33 سنة وأتجوزت من 3 سنين، جوزي جه طلب إيدي من أهلي ووافقوا وأتخطبنا وساعتها مكنش صوته بيطلع والله، لكن زي ما بيقولوا تحت السواهي لأني بعد الجواز لقيت بني أدم تاني خالص عايش معايا، جهزنا كل حاجة وأتجوزنا وفضل حوالي 6 شهور مفيش صوت عالي ولا خناقات، لحد أول خناقة بيني وبينه
وتابعت هويدا في يوم قبل ما أدخل أنام قالي جهزي الهدوم بتاعتي عشان الشغل، وجهزت له قميص وبنطلون، وصحيت الساعة 6 الصبح على صوت عالي وكانت أول مرة يتعصب وبقوله في إيه، قالي أنا مش عايز القميص ده قولتله طيب خلاص حقك عليا وهكوي واحد تاني غيره عقبال ما أنت ما تجهز بس، شتائم وإهانة ووصلة من الصوت العالي وأخد بعضه ونزل
وأضافت هويدا قائلة لما رجع البيت بالليل قولتله أنت فيك حاجة في مشاكل طيب، قالي ليه مجنون بكلم نفسي قولتله طيب خلاص وقعدت حوالي 3 أيام مش بنتكلم وبعدها صالحته، وعدت الأيام وكل فترة كانت بتحصل مشكلة يفرج عليا فيها الجيران وشتائم وسب وصوت عالي جدا، وفي مرة مسح بيا الشارع قدام الناس عشان كان بيشتري تي شيرت وقولت له مش لايق عليك
وأختتمت هويدا مشكلتها مع زوجها وبعد 3 سنين جواز، وعشان هي بتيجي على أهون الأسباب، في يوم وهو راجع من الشغل بالليل دخل يغير هدومه وخرج، بيسأل هناكل إيه، قولتله عملت لك كشري أنت بتحبه، قالي كشري أيه اللي هاكله هو أنا مش مديكي مصروف، مش واكل وفضل يشتم بقى ساعتين وصوت عالي لحد ما واحدة من الجيران خبطت وقالتله أهدى يابني قالها ياحاجة أنتي متعرفيش حاجة أنا مستحمل بالعافية وزهقت ومش عايزها، قولتله لو مش عايزني طلقني قالي معنديش طلاق، أخدت هدومي ومشيت روحت عند أهلي ورفعت قضية خلع