طريقه عمل الحمام الكداب

طريقه عمل الحمام الكداب

عندك أوراك فراخ  ….هنعمل بيها احلي حمام كداب محشي بخلطه الفريك بدون ورق فويل أو استرتش وبدون سلق وبجد تحفففه

طريقه عمل الحمام الكداب

اوراك الفراخ المحشيه

لتتبيل الاوراك

ملح …..فلفل اسود…..بابريكا ….بهارات فراخ

معلقه زبادي كبيره

بصله كبيره مبشوره

معلقه كبيره مسترده

خل

ممكن تتبليها بأي طريقة انتي بتحبيها عادي وبالنسبه للحشوه ممكن تحشيها بحشوه الحمام اللي انتي متعوده عليها بردو يعني براحتك

مقادير الحشوة

فريك

بصله كبيره مقطعه مكعبات صغيره

كبد فراخ مقطعه

توابل …..ملح …فلفل اسود…..بهارات فراخ……رشه قرفه مكعب مرقه

طريقه التحضير

هنتبل الفراخ ونسيبها تتنقع في التتبيلة علي الاقل ساعتين

بعدين هنجهز الحشوه ونسيبها تبرد

وهي عباره عن

هنشوح البصل في سمنه لحد ما ياخد لون خفيف وبعدين ننزل بالفريك مغسول ومتصفي ونقلب فيه لحد ما يفلفل

وبعدين نركنه في نفس الطاسه علي جنب ونحط الكبد نشوحها ونرش عليها رشه قرفه ونحط فلفل اسود وبهارات فراخ وملح وبعد ما يتشوحوا كويس نقلبهم مع الفريك وبعدين ننزل بمقدار بنصف مقدار الميه ايلي بنسوي بيها الفريك عشان عايزه نص سوا بس وتغطيه ونسيبه علي نار هاديه لحد مايبقا نص سوا

وبعدين نسيبه يبرد تماماً

واول مايبرد هنحشي الاوراك كميه مناسبه مش كتيره عشان متخرجش وقت التسويه

ونقفلهم بخله اسنان كويس أو بخيط ونرصهم في صينيه ونحط عليهم كوبين شوربه سخنه وورق لوري وفصين حبهان ونغطيهم بورقه زبده وفوقها بورق فويل وندخلهم الفرن اول ما يستوا نشيل الغطاء من عليهم ونسيبها يتشربوا خالص من اي شوربه فيهم وبعدين نطلعها ندهنها من الصوص اللي طلع منها وكمان ندهنها بشويه من الكاتشب من كل الجوانب

وادخلها تحت الشواية تاخد لون وبس كدا وتقدميها

بألف هنا وشفا⁦.