6 رمضان..الحمام المحشى فريك اورز
6 رمضان..الحمام المحشى فريك اورز
هنعمل الحمام خطوط خطوه
الحمام المحشى فريك اورز
اولا .. التنظيف
هنغسل الحمام و ننضفه براحه خالص عشان جلده طرى مش بيستحمل ….بجيب بوله كبيره فيها مايه و شوية خل و انقع الحمام فيه يدوب ٥ دقايق مش كتير عشان ميتهريش
و ابتدى انضفه من عند الرقبه و من كل الجهات …بس هو بيكون نضيف بس زياده تأكيد
نحضر بصلة كبيرة ونقطعها مكعبات ونشوحها في حلة على النار في معلقتين زيت ونحط عليها قرفة وبهارات مشكلة وملح وبعدين نضيف لها الفريك (يكون منقوع في ماء مغلي لمدة نص ساعة) ونغسله ونصفيه.
نقلب الفريك قليلاً مع البصل ثم نضيف عليهم كوباين مياه ونتركه على نار عالية حتى يتشرب المياه كلها.
ثانيا الارز
طبعا الحشوه حسب الكميه ..انا هنا معنا( ١٠ حمامات)و اخدوا( ٣كوبيات ارز) بالظبط
بصلتين وسط و نبشرهم و بعدين نشوحهم على النار مع معلقتين سمنه و معلقة زيت و فضلت اقلب لغاية ما لونها دهبى فاتح …و كنت محضره الكبد و القوانص بتوع الحمام
و ضيفتهم و قلبت و بعدين عليهم التوابل …
ملح و فلفل/حبهان مطحون/قرفه/٧بهارات/رشة كركم و مكعب مرقه
و قلبتهم تانى …انا هنا مش عايزه الكبد و الأوانص يستووا للاخر يدوب بس تشويحه
و بعديها ضفت الارز …التريكه هنا …لازم ننقع الرز ٥ دقايق فقط
و تصفيه و نضيفه على الكبد و الاوانص و نقلب كويس و بكده هيكون الحشو جاهز معانا و نحشى اول ما يبرد
طريقة الحشو :
فى صوره واضح فيها الطريقه …بنحشى الاول من عند الرقبه براحه و منملاش اوى عشان ميفرقعش مننا عند السوى …..انا هنا عايرت( لكل حمامه ٤ معالق كبيره خلطه)
كمان هنحشى من الناحيه التانيه و ما بين الجلد و نقفل رجل الحمامه …خليكوا فاكرين الحمامه بتاخد ٤ معالق رز بالخلطه و لو الحمامه حجمه اصغر ممكن تاخد اقل …
ونفس الشئ للفريك
طريقة التسويه
هنحضر حله كبيره و ده طبعا حسب الكميه….و اول ما تغلى هضيف (ورق لورى/مستكه/حبهان) و نسقط فيهم الحمام براحه و يكون على ضهره عشان الرز مينزلش منه و نسيبه على النار حوالى ساعه ….اول ما يستوى نطلعه براحه على مصفى كبيره و نسيبه يبرد و بعدين نحمره فى زيت و سمنه
فى طريقة حلوة لتحميره ممكن ندهنه حليب معاه قشطة ندهن بالفرشة ونحمر بعد السمن ما يسخن بيدى لون تحفة
و بس كده ….احلى من اى مطعم