جدول أكلات للشهر كاملاً
جدول أكلات للشهر كاملاً
إحفظوه هيفيدكم
جدول شهر للاكلات,وفرى وقتك فى اختيار اكلاتك
١-أرز بالشعرية + طاجن بسلة باللحمة + سلطة + مخلل
٢-صنية مسقعة بالبشاميل + عيش + مخلل
ممكن الاكلة دي تكفى يومين علي حسب عدد افراد الاسرة
ولو مش بتحبوا تاكلو نفس الاكل ورا بعض
يبقى الباقى يتشال في علبة في الفريزر ونطلعة يوم تان
٣-كشرى مصرى + مخلل
او تعملى جمبه كبد وقوانص فراخ تكونى فرماهم في الكبة
وتشوحيهم ببصل طبعا القوانص والكبد دي
بتبقي محوشاهم من الفراخ اللي بتشتريها
٤-كفتة فراخ + مكرونة + سلطة
كفتة الفراخ موفرة جدا وبترمى عدد كتير وبرضة
علي حسب عدد افراد الاسرة
يعنى لو انتة اتنين ممكن يكفيكوا صدر واحد ولو اكتر من 2 يبقى صدرين اوتلاتة
هيغرقوا الدنيا ومعاهم طبعا بطاطس مبشورة وبصل وخضرة كل دة بيضاعف الكمية
والباقى شيلية فى الفريزر ممكن تاكلوة يوم تانى
وبلاش تشترى بانية جاهز هاتى الفراخ واخليها في البيت احسن بكتير واوفر كمان
٥-أرز بالبشاميل + سلطة
صدر فرخة واحدة وتقطعية حتت صغيرة
وتشوحيها مع بصل وفلفل اخضر وطماطم وفصين توم
وتوابلك المفضلة
وتعملي ارز ابيض وبعدين تجيبى الصنية تحطى راق ارز وبعدين الفراخ
وبعدين باقى الارز وبعدين البشاميل بنص كيلو لبن
ممكن تاكلوها علي يومين الاكلة دي تحفة وموفرة جدا
٦-عدس + ارز + بصل في ماية وخل وليمون عيش
٧-بطاطس بيورية + بابا غنوج + شكشوكة + عيش وسلطة
٨-مكرونة محمرة + اجنحة فراخ محمرة بالبقسماط + سلطة + بتنجان مخلل
الاجنحة لو مش محوشاها عندك من الفراخ اللى بتشتريها او نص كيلو من برة
٩-حواوشى + سلطة + مخلل
١٠-كفته ارز + ارز + مخلل
حتحتاجى نص كيلو لحمة مفرومة
نص ارز وبصل مفروم وخضرة وتوم وتوابل الاكلة دي تكفيكي يومين
طبعيها واقليها وقسميها وشيليها
١١-سمك بانية + ارز + سلطة طحينة وسلطة خضرا
١٢-بيتزا بالخضروات او بالسجق او اللحمة المفرومة
نص كيلو لحمة مفرومة او سجق هيعملولك 3 بيتزات ممكن يكفوكي يومين
١٣-عجة+ بطاطس محمرة + طماطم مخللة
١٤-مكرونة بيتزا + سلطة
١٥-قرنبيط + سلطة + مخلل + عيش
١٦-جلاش باللحمة المفرومة + بطاطس محمرة
صنية الجلاش دي ممكن تعمليها بربع لحمة مفرومة
وممكن بكبد وقوانص فراخ
١٧-ارز بالبيض + سلطه + مخلل
١٨-محشى كرنب + فراخ + ملوخية
١٩-رنجة + بطاطس محمرة
ممكن تعملي الرنجة بالطماطم والفلفل الاخضر بتبقى تحفة
٢٠-كوسة بالشاميل + سلطة
حنحتاج ربع لحمة مفرومة ونص لبن
٢١-ارز بالبسلة والجزر + فراخ بانية شرايح + بطاطس محمرة
حنقطع الفراخ بانية شرايح بالطول كدة بتدى عدد اكتر
٢٢-سمك فيش فينجر + ارز صيادية + سلطة
السمك الفيلية بيتقطع شرايح بالطول
وبعدين تعملليلة تتبيلة عصير بصل وعصير طماطم وخل وليمون وتوابل سمك
وبعدين تحطية في دقيق وبعدين بيض وبعدين بقسماط بالسمسم ده بقى واااااو
وبيعمل اكتر من اكلة هو دة نفس الكيلو اللي عملنا منة البانية
٢٣-بصارة + عيش + مخلل
٢٤-مسقعة بالخل والتوم + بطاطس محمرة
٢٥-مكرونة بالصلصة + بيض مسلوق ومحمر + سلطة
٢٦-كبسة + فراخ+ سلطة
ومتقوليش دي مش موفرة لا الارز البسمتى بيزيد جدا في السوا
وبعدين احنا مش هنقضيها شعبيات على طول
٢٧-شاورما فراخ + عيش + سلطة
قطعى بصل كتير وطماطم وفلفل عشان الكمية تزيد
وتوابلك المفضلة الاكلة دى بترمى كمية كبيرة
هنحتاج صدر فرخة متقطع رفيع
٢٨-شيش سمك + ارز + سلطة طحينة
برضة سمك بانيه يابنات الكيلو مش غالى نص كيلو حيظبطك
29_كشرى اصفر + مخلل+ بيض مسلوق
30- ارز + ملوخية + لحمة
وبكده هي كون عندك ملف كامل وانتي حرة الاختيار.
صحه وهنا