#تفاصيل خناقة ندى عفيفي مع لوسي في كواليس «الحفيد»
#تفاصيل خناقة ندى عفيفي مع لوسي في كواليس «الحفيد»
اتّهمت الفنانة الشابة ندى عفيفي النجمة لوسي بمجموعة من الاتهامات منها سبها وضربها خلال كواليس مسرحية “الحفيد” المقدّمة على خشبة المسرح القومي.
وسردت ندى عفيفي، في منشور عبر حسابها الشخصي بموقع التوصل الاجتماعي “فيسبوك” تفاصيل الأزمة كاملة: “هخرج عن صمتى واتكلم وانا مرفوعة الرأس ومش هتكسف اقول اللى حصل معايا فى عرض الحفيد”.
أضافت: “أولا بأكد كل معلومة اتكلموا فيها زمايلي من انتهاكات حصلت فى حقنا وكان سببها الفنانة لوسي، بل بالعكس فى حجات كتير وتفاصيل كتير متقالتش.. وعايزة اقول احنا مكناش ساكتين ضعف أو تهاون فى حقوقنا ابدا بالعكس احنا كنا ساكتين احتراما للتحقيقات اللى كانت بتحصل والقائمين عليا وحب فى سمعه عرض الحفيد والمسرح القومى بالرغم من تصريحات الفنانه لوسي فى برنامج الاستاذه لميس الحديدى واللى كانت كلها افتراءات وتخلو تماما من اى شئ من الصحة”.
لوسي والفنانة الشابة ندى عفيفي
وتابعت “الواقعة اللى تخصنى وهى أن الفنانة قامت بضربى وشتمى أمام الجمهور بالفعل مما اصابنى بالذهول وسابتنى على المسرح وخرجت وما كان مني إلا انى احترمت المسرح القومى والجمهور الغالى وزمايلي وكملت شغلى، لكن فور خروجى من على المسرح اصابتنى نوبه انهيار ومع ذلك كملت العرض زى أى فنان محترم وبيحترم شغله والخشبه اللى واقف عليها”.
واستكملت: “دخلنا المشهد اللى بعده مسكتني وعنّفتني تاني أمام الجمهور وانا فى منتهى الذهول من العبث اللى بيحصل من فنانة كبيرة كان عندى امل أننا نتعلم من خبرتها الفنية وأن تحتضن هى مشاكلنا بدلا من افتعالها”.
أضافت:“خلصت ليلة العرض وما كان من استاذ ايهاب فهمى مدير المسرح القومى كل التقدير لشخصه الا كل احتواء لنفسيتى وجبر خاطرى ووعدى بأنه قام باللازم مع الفنانه لوسي وأن حقى هييجي وانا مازلت حتى الآن أشكره لدعمنا واحترامه لفننا وبعدها توقف العرض والى باقى الأحداث اللى انتو تعرفوها”.
واختتمت المنشور قائلة: “من الجدير بالذكر أن المخرج يوسف المنصور وعدنى أن اللى حصل ده مش هيعدى وكان مساندني وقاللي أنه خلاص تم الاتفاق على أننا هنستبدل الفنانة لوسي بفنانة أخرى وإن ده الطبيعي مع تخطي فنان لحدوده بهذا الشكل وفعلا فضلنا منتظرين معاد أول بروفة مع الفنانة الأخرى إلا أننا فوجئنا جميعا بالشكوى اللي قدمتها الفنانة لوسي لمعالي وزيرة الثقافة دكتورة نيڤين الكيلاني رغم أننا كنا متخيلين أن الفنانة لوسي هتبقى سعيده بقرار استبعادها، لأنها دايما كانت بتقول انها مش عاوزه تكمل معانا، لكن طبعا الشكوى اللي هي قدمتها وقفت العرض وحصل بعد كده اللي زمايلي نشروه”.