جمهور الزمالك يشكر المهدي سليمان للصعود لنهائي الكونفدرالية
لو في لاعب واحد لازم يشكروا جمهور الزمالك علي الصعود الي نهائي الكونفيدرالية ف مليون في المئه هيكون الراجل ده !
المهدي سليمان من الاخر كان روح الزمالك في مباراتين بلوزداد ، الراجل ده في وسط ضغط بلوزداد المرعب في الجزائر عمل 3 تصديات منهم تصدي عظيم كان هدف محقق ل بلوزداد !
و النهاردة في وسط ما الزمالك رتمه واقع و الدقيقه وصلت 83 عمل التصدي المبهر اللي قدامك ده و شال هدف محقق و بسببه الزمالك مستقبلش اي هدف في المباراتين و صعد الي النهائي !
المهدي
الراجل ده حقيقي بيحصد تمن تعبه و مجهوده علي مدار 18 سنة متتاليه في الملاعب المصرية ، من انبي الي المقاولون الي بتروجيت الي غزل المحلة الي سموحة الي بيراميدز الي الاتحاد ثم الي الزمالك الموسم الحالي في عمر ال 38 !
قالوا عليه حارس مرمي تالت و استبن ، النهاردة هو الحارس الاساسي للزمالك و اثبت نفسه علي الجميع و اتسبب في صعود الزمالك الي نهائي الكونفيدرالية بالرغم انه صفقه ببلاش ، المهدي سليمان بيعيش اجمل حلم في حياته
